«Islomxo‘ja» filmining yopiq premyerasi bo‘lib o‘tdi
Rejissor Jahongir Ahmedov tomonidan suratga olingan «Islomxo‘ja» nomli tarixiy badiiy-publitsistik filmning yopiq premyerasi bo‘lib o‘tdi.
Premier Hall kinoteatrida bo‘lib o‘tgan taqdimotda film ijodkorlari, soha mutaxassislari hamda jurnalistlar qatnashdi.
Film XX asr boshlarida nafaqat Xorazm muzofoti balki, butun Markaziy Osiyo hududi, hatto Chor Russiyasining amaldorlari orasida yuksak nufuzga ega bo‘lgan Xiva xonligining bosh vaziri Islomxo‘janing hayoti va mehnat faoliyati haqida hikoya qiladi. O‘z davrining taraqqiyparvar, xalqparvar, davlat va jamoat arboblaridan biri bo‘lgan Islomxo‘ja 17 yoshidan xonlikning savdo va sanoat markazlaridan biri hisoblanmish Xazorasp bekligiga xokimlik qilgan, 26 yoshida Xiva xonligining bosh vaziri etib tayinlangan. Valiaxd Asfandiyor to‘raning hukmronligi davrida Islomxo‘ja xonlikning barcha muhim va ma’suliyatli vazifalarini o‘z zimmasiga olib, ko‘plab inshoatlar qurdirgan. Qator sohalarda islohotlar olib borgan. Biroq, xonlikning eng yuqori amaldori, buyuk islohotchi Islomxo‘ja sirli ravishda o‘ldirilib, hatto qotillikni fosh etish uchun boshlangan tergov harakatlari bosdi-bosdi qilingan.
Filmning suratga olish ishlari Rossiyaning Sankt-Peterburg shahrida hamda Xiva, Toshkent shaharlarida film uchun maxsus tayyorlangan dekoratsiyalarda bo‘lib o‘tgan.
Film ijodiy guruhi Rossiyaning Sankt-Peterburg shahrida xizmat safarida bo‘lib, buyuk ajdodimizning Rossiya bilan bog‘liq faoliyatini o‘rganib qaytgan. Bundan tashqari tayyorgarlik ishlari 20 kundan ortiq vaqt mobaynida Xivada, arxiv va muzeylarda 15 kun, Toshkentda muhtasham dekoratsiya tayyorlash uchun esa 20 kundan ortiq vaqt sarflangan.
Filmda bosh rollarni Ulug‘bek Qodirov, Alisher Uzoqov hamda Asal Shodiyevalar ijro etishdi. Shuningdek, filmda O‘zbekiston xalq artisti Muhammad Ali Abduqunduzov, O‘zbekistonda xizmat ko‘rsatgan artist Matyoqub Matchonov, Hoshim Arslonov, Boir Xolmirzayev, aktyorlar Muhammad Iso Abdulxayirov, Husan Jo‘rayev, Azamat Axrorov, Elbek Fayziyev, Akmal Mirzo, Bobur Aytmagambetov, Gulruh Zokirova singari aktyor va aktrisalar rol ijro qilishgan.
Manba: Myday.uz
Bizni Telegramda ham kuzatib boring >>>https://t.me/PANORAMAUZ
{$ noItemsMessage $}