11 metrdan tepolmaganning o‘rnida o‘zim bo‘lsam dedim
Shavkat Mirziyoyev futbol bo‘yicha Yaponiyaga qarshi U-23 finalini eslab, jamoa penaltidan unumli foydalana olmay, mag‘lub bo‘lgach, 3 kun uxlamay chiqqanini aytdi. “Uning o‘rnida o‘zim bo‘lsam dedim. Bittagina to‘p-a!” degan prezident jamoaning Olimpiya o‘yinlariga yo‘llanma olganini katta yutuq deb atadi.
Shavkat Mirziyoyev 16-may kuni Kinochilar saroyida o‘tgan madaniyat sohasi vakillari bilan uchrashuvda futbol bo‘yicha Yaponiyaga qarshi U-23 finali haqida gapirib o‘tdi. Davlat rahbari har qaysi sohanining ichiga kirib, mukammal shug‘ullansagina natija bo‘lishini aytib, jamoaning Olimpiya o‘yinlariga yo‘l olganini misol tariqasida keltirdi.
O‘yinda 23 yoshgacha bo‘lgan o‘zbekistonlik sportchilar 1:0 hisobida mag‘lub bo‘lib, ikkinchi o‘rinni egallagan va o‘sha bahsda Umarali Rahmonaliyev penaltidan unumli foydalana olmagandi.
“11 metrni urmaganidan keyin men 3 kun uxlamay chiqdim, bilasizlarmi? Uning o‘rnida o‘zim bo‘lsam deyman-da. Nimaga shunday bo‘lishi kerak?! Bittagina to‘p-a! Shunday mahorat qildi. Ularning ko‘pi bilan gaplashdim, telegramma yubordim. Biz ham darrovgina chempion bo‘lamiz deymiz-da. Birinchi marta jamoamiz Olimpiadaga o‘rin oldi. Bu ham katta yutuqlarimiz”, — deydi prezident.
Davlat rahbari, futbol oson ish emasligi, dunyoga mashhur 5−6 ta jamoada o‘zbekistonlik futbolchilar o‘ynayotgani unda g‘urur uyg‘otishini qo‘shimcha qildi.
Championat.Asia sport nashri tarixda ilk bor futbolchilar Olimpiada yo‘llanmasi uchun 30 ming dollar olgani haqida xabar berdi. Yoshlar terma jamoasi bosh murabbiyi Timur Kapadze savolga javob berar ekan, murabbiylar ham pul mukofoti olganini tasdiqladi.
{$ noItemsMessage $}