«Устюртга йўл» бадиий фильмининг трейлери
«Ўзбеккино” Миллий агентлиги буюртмасига асосан “Қорақалпоқфильм” киностудиясида “Устюртга йўл” номли бадиий фильм суратга олинди. Фильмни тасвирга олиш ишлари Қорақалпоғистон Республикаси, Хоразм вилояти, Тошкент шаҳри ва Жанубий Кореянинг Сеул шаҳрида бўлиб ўтган.
Абдувоҳид Ғаниев режиссёрлигида суратга олинган мазкур фильмда Қорақалпоғистон Республикасининг Қўнғирот туманидаги Устюрт газ-кимё мажмуи қурилиши жараёнлари бадиий талқинда ҳикоя қилинади. Яқиндагина олий ўқув юртини тамомлаган ёш, истеъдодли мутахассис Нодир бир гуруҳ тенгдошлари билан ана шу тарихий қурилишда иштирок этиш учун Устюртга йўл олади. Улар мураккаб табиатли бу масканда ишлаш жараёнида жиддий синовларни бошдан кечиришади. Лекин ҳар қандай шароитда ҳам улар ортга чекинмайди.
Картинада янгича фикрлайдиган, изланувчан ва ташаббускор ёшлар ҳаётига кенг ўрин берилган. Шу билан бирга, ҳақли равишда “аср қурилиши” дея ном олган ушбу мажмуанинг мамлакатимиз иқтисодий юксалишида тутадиган ўрни ва аҳамиятига ҳам алоҳида эътибор қаратилган.
Фильмнинг кенг жамоатчилик учун премьераси 20 декабрь куни соат 17:00да Республика Киночилар уйида ҳамда соат 18:00да Алишер Навоий номидаги киносаройда ташкил этиди.
Бадиий фильм 21 декабрдан эътиборан юртимиз кинотеатрларида намойиш этилмоқда.
{$ noItemsMessage $}