Shavkat Rahmon. Sharhi hol | Шавкат Раҳмон. Шарҳи ҳол

ШАРҲИ ҲОЛ

Шуҳрати сочилди бодияларга.
зарбадан бештага бўлинди андуҳ.
Йилларга ем бўлган обидаларда
тинимсиз айланар чирқираган руҳ.
Бузилди азоб-ла қурилган диллар,
илинждан ўзга бир туйғу сиғмади.
Насабин билмаган шўрлик етимлар
ғафлатда ухлади,
кимлар йиғлади
Фитналар домида пишган зулмдан
айвсиз босилди қўзғолган ёдлар,
ўзликни топтаган маккор илмдан
кулгуга айланиб кетди фарёдлар.
Ким қолди?
Иблиснинг макрига учиб,
қирпичоқ бўлгувчи аламон қолди,
юз йиллик адоват заҳрини қусиб;
қонига ғарқ бўлган ғалаён қолди.
Ким қолур?
Ҳаттоки сўнгги лаҳзада
кўзлари тўймаган жобирлар қолур,
ўлим-ла ўйнашган назм авжида
юраги ёрилган шоирлар қолур.

Шавкат Раҳмон

* * *

SHARHI HOL

Shuhrati sochildi bodiyalarga…
zarbadan beshtaga bo‘lindi anduh.
Yillarga yem bo‘lgan obidalarda
tinimsiz aylanar chirqiragan ruh.
Buzildi azob-la qurilgan dillar,
ilinjdan o‘zga bir tuyg‘u sig‘madi.
Nasabin bilmagan sho‘rlik yetimlar
g‘aflatda uxladi,
kimlar yig‘ladi
Fitnalar domida pishgan zulmdan
ayvsiz bosildi qo‘zg‘olgan yodlar,
o‘zlikni toptagan makkor ilmdan
kulguga aylanib ketdi faryodlar.
Kim qoldi?
Iblisning makriga uchib,
qirpichoq bo‘lguvchi alamon qoldi,
yuz yillik adovat zahrini qusib;
qoniga g‘arq bo‘lgan g‘alayon qoldi.
Kim qolur?
Hattoki so‘nggi lahzada
ko‘zlari to‘ymagan jobirlar qolur,
o‘lim-la o‘ynashgan nazm avjida
yuragi yorilgan shoirlar qolur.

Shavkat Rahmon