Maqsad – hududda osoyishtalikini taʼminlash

Prezidentimizning 2017 yildagi qarori asosida haftaning har payshanba kuni “Jinoyatchilik va huquqbuzarliklarni profilaktika qilish kuni” deb belgilanib, shu kungacha poytaxt IIBB shaxsiy tarkibi tomonidan jamoat tartibi va fuqarolar osoyishtaligini taʼminlash, huquqbuzarliklar profilaktikasi borasida qator tadbirlar amalga oshirib kelinmoqda. Kuni kecha Chilonzor tumanida o‘tkazilgan profilaktik tadbirlar ertalabki yo‘riqnomadan boshlandi. Tuman sektor rahbarlari va barcha tashkilotlar mutasaddilari ishtirokida o‘tkazilgan yo‘riqnomada kun davomida amalga oshirilishi lozim bo‘lgan ishlar muhokama qilib olindi. Shuningdek, ichki ishlar vazirligi tomonidan o‘tkazilayotgan “Xavfsiz hudud va mulkiy turdagi jinoyatlarga qarshi kurashish oyligi” doirasidagi tadbirlar rejalashtirildi.
Shundan so‘ng, Chilonzor tumani 3-sektor rahbari, tuman IIO FMB boshlig‘i, podpolkovnik Neʼmatullo Xaydarov “Ko‘rkam” mahalla faollari ishtirokida tumandagi suv havzalaridan birida sodir etilgan o‘g‘irlik jinoyati muhokamasini o‘tkazdi. Unda jinoyatchilikka yo‘l qo‘ymaslik, uni oldini olish borasida targ‘ibot-tushuntirish ishlarini olib borildi.
“3-Charx Kamolon” mahalla fuqarolar yig‘inida tuman sudi sudyalari, mahalla ahli ishtirokida sayyor sud majlisi o‘tkazildi. Unda maʼmuriy huquqbuzarlik sodir etgan shaxslarning qilmishlariga qonuniy baho berilib, tegishli jazolar tayinlandi.
“Bekto‘ppi” mahalla fuqarolar yig‘ini hududidagi avtoturargoh, bozor atroflari, aholi gavjum joylarda qonunbuzarliklarga yo‘l qo‘ymaslik, jamoat tartibini saqlash borasidagi targ‘ibot tadbirlariga tuman IIO FMB boshlig‘ining jamoat tartibini saqlash bo‘yicha o‘rinbosari, podpolkovnik Q.Ko‘chimov boshchilik qildi.
Shuningdek, 4-son IIB profilaktika inspektori, kapitan A.Mirzaalimov mahalla yettiligi hamkorligida “mahallabay”, “xonadonbay” ishlash tizimi orqali “Zarqo‘rg‘on” mahalla fuqarolar yig‘inida joylashgan ko‘p qavatli uylar aholisining turmush sharoitlari va muammolarini o‘rganishdi. Mahalla hududida xavfsizlikni taʼminlash, mulkiy jinoyatlarga qarshi kurash borasida targ‘ibot ishlari olib borildi. “Chilonzor buyum bozori savdo kompleksi”, “Toshkent savdo markazi” bozorlari hududida 5-son IIB boshlig‘i, podpolkovnik T.Holiqov, profilaktika hamda patrul-post xizmati inspektorlari hamkorligida “Xavfsiz hudud va mulkiy turdagi jinoyatlarga qarshi kurashish oyligi” doirasida aholi keng qatlamlarini jalb qilgan holda targ‘ibot-tushuntirish ishlarini olib bordilar. Bu kabi tadbirlar barcha tumanlarda o‘tkazilmoqda.