O’zbekiston — Saudiya o’yini haroratini «jonli kamera»da olingan kadrlar
Oʻzbekiston milliy jamoasi JCH-2022 saralashidan oʻrin olgan Saudiyaga qarshi oʻyinda imkoniyatni boy berdi. Vadim Abramov qaytganidan buyon bu milliy jamoaning ilk magʻlubiyati boʻldi. Aslida hammasi futbolchilarimiz uchun yaxshi oʻtayotgandi…
Oʻyinni juda yaxshi boshlagan Abramov jamoasi oʻzi xohlagan toʻpni nazorat qilishni yaxshi uddaladi. Raqib jarima maydoni oldidagi pressing esa gol urilishiga olib keldi. 16-daqiqada Eldor Shomurodov Ikrom Aliboyevning toʻpni olib qoʻyganidan soʻng raqib darvozasini ishgʻol qildi. Ammo yigitlarimizning xursandchiligi uzoqqa choʻzilmadi. 23-daqiqada Salmon al-Faraj penaltini gol bilan yakunladi.
Ikkinchi boʻlimni ham futbolchilarimiz yaxshi boshlashdi. 56-daqiqada Farrux Sayfiyevning zarbasidan soʻng toʻp saudiyalik futbolchining qoʻliga tegdi va hakam endi Saudiya darvozasiga penalti belgiladi. Standartni Otabek Shukurov bexato amalga oshirdi.
Ammo oʻyin oxirida iroda koʻrsatgan saudiyaliklar gʻalabani ilib ketishdi. 85-daqiqada Salmon al-Farajning zarbasi rikoshet orqali golga aylandi. 90-daqiqada esa bir muddat “Vilyarreal”da tajriba orttirgan Salim al-Dosari super goli bilan Saudiyaga gʻalaba keltirdi.
Oʻyindan keyin Vadim Abramov raqib hech qanday jabhada ustunlik qilmaganini, ularning gollari mantiqiy boʻlmaganini aytdi. Raqib murabbiyi Erve Renar ham jamoasi futbolchilarning individual mahorati evaziga gʻalaba qozonganini yashirmadi.
{$ noItemsMessage $}