Onlayn ko’rsatma olayotgan «Zakladchik»lar qo’lga tushdi

Qora dori isteʼmol qilganning ham, uning savdosi bilan shug‘ullanganning ham so‘nggi borar manzili o‘z umrining zavoliga borib taqaladi. Mo‘may pul evaziga bunday og‘u savdosi bilan shug‘ullanadiganlarning xizmatini qilish esa ham o‘zining, ham o‘zgalarning hayotini xavf ostiga qo‘yish demakdir. Ichki ishlar vazirligi Tezkor qidiruv xizmati departamenti, Jinoyat qidiruv bosh boshqarmasi hamda Toshkent shahar Ichki ishlar bosh boshqarmasi xodimlari bilan hamkorlikda “Qora dori – 2023” tadbirlari o‘tkazilmoqda.

Bektemir tumani Abay MFY Qo‘qon darvoza ko‘chasida 24 iyun kuni ikki nafar yigit o‘zlarining shubhali xatti-harakatlari bilan xodimlar eʼtiborini tortdi. Ular to‘xtatilib, xolislar ishtirokida tekshirilganda yigitlardan birining cho‘ntagidan bir dona qizil rangli yelim o‘rama, yelkasida bo‘lgan portfel ichidan esa 21 dona xuddi shunday o‘ramlardagi jigar rangli o‘tsimon va kristallsimon aralashma moddalar borligi aniqlanib, xolislar ishtirokida rasmiylashtirib olingan.

Birinchi gumonlanuvchi: “Yozning boshida biz do‘stim Nikita bilan ish izladik. Internatda kuryerlik bo‘yicha eʼlonni ko‘rib qolib ular bilan bog‘landik. Dastlab, biz nima yetkazib berish kerakligi haqida bilmagan edik. Do‘stim internetdan bir dasturni yuklab oldi va ular bizga dastur orqali qanday ishlash kerakligini o‘rgatishdi. Shundan so‘ng do‘stim ularga oldindan 500 rubl miqdorida to‘lov qildi. Keyin bir kunimiz ish o‘rganishga ketdi va biz bildikki, bu taqiqlangan giyohvand moddalar savdosi ekan. Biz bu ishda ko‘p ishlamaslikka qaror qildik”.

Surishtiruv ishlari davomida yigitlar ushbu moddani «spays» nomli giyohvand moddasi ekanligini, «Xasan» ismli shaxs bilan o‘zaro kelishib, geolokatsiya orqali olganligini aytishdi.

Ikkinchi gumonlanuvchi: “24 iyun kuni do‘stim bilan ular ko‘rsatgan manzil yaʼni Toshkent viloyatidagi Yuqori Chirchiq tumaniga bordik. Chetroqda dala joyga ko‘milgan narsani oldik va ularga olganimiz haqida rasm yubordik. O‘ralgan narsani ochib ko‘rganimizda uning ichidan 25 ta o‘ramda har birida 2 grammdan «spays» bor edi. Keyin ular bizga qayerga borish kerakligi haqida lokatsiya yuborishdi. Manzil Bektemir tumani ekan. Ular 3 soat vaqt berishar, biz uchun bu vaqtda o‘ramlarni belgilangan joyga borib ko‘mib kelish qiyin vazifa edi. Sababi 10 ta o‘ramni biz kun bo‘yi joylashtirganmiz. Vazifani bajarayotgan vaqtimizda esa bizni Ichki ishlar xodimlari ko‘rib qolishdi”.

Yigitlar internetdagi ko‘rinmas narkokuryer tomonidan boshqarilgan va ularga doim qisqa vaqt ichida topshiriqni tezkorlik bilan bajarish talabi qo‘yilgan. Agarda ular bu ishdan bosh tortishsa, ularni ayanchli xotima kutishi bilan qo‘rqitib kelingan.

Hozirda yigitlarga nisbatan Jinoyat kodeksining 273-moddasi yaʼni giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab, qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish bo‘yicha jinoyat ishi qo‘zg‘atilgan.