Abdulla Oripov. Savol | Абдулла Орипов. Савол
ziyouz23486
САВОЛ
Танҳо саҳроларга бош олиб кетсам.
Ё йироқ ғорларни ошён этсам,
Бедўсту беёрон тугасам, битсам,
Кўнглинг тўладими, ўшанда, айт-чи?
Қолмаса дунёда мендан хотирот,
Наинки хотирот, оддий, жўн бир от.
Бўлса на бир қавмим, на хеш, на авлод,
Кўнглинг тўладими, ўшанда, айт-чи?
Оламга ўт қўйса ҳар айтар сўзинг,
Йиқсанг дунёларни – тиккан чоқ кўзинг,
Сўнгра мўри каби қолсанг бир ўзинг,
Кўнглинг тўладими, ўшанда, айт-чи!
1984
Абдулла Орипов
{$ noItemsMessage $}