Alisher Navoiy. Ishq dashtin hech gʻurbatkash musofir koʻrmasun (gʻazal)

98
ziyouz
ziyouz22486

    Ишқ даштин ҳеч ғурбаткаш мусофир кўрмасун,
    Мен ғариб ул дашт аро кўрганни кофир кўрмасун.

    Ёрмангиз Фарҳоду Мажнун оллида кўксумниким,
    Ботинимнинг дарду доғин аҳли зоҳир кўрмасун.

    Даҳрни қил тийра, ё рабким, анинг туфроғидин
    Ҳар не кўз мумкин эса бўлмоққа нозир, кўрмасун.

    Ҳар боқишда қатли ом айлар кўзунгким, даҳр эли
    Ҳеч кимни сен кеби бу фанда моҳир кўрмасун.

    Воизо кўп васф қилдинг сомирининг сеҳрини,
    Ҳозир ўлғилким, сени ул кўзи соҳир кўрмасун.

    Кимки ошиқлик асиридур, тахайюл бирла ҳам
    Ишқ кўйида ўзин осуда хотир кўрмасун.

    Ким, Навоийдек фано водийсида истар ҳузур,
    Кечсун ўздин, балки худ ўзлукни ҳозир кўрмасун.

    Алишер Навоий

    Комментарии

    Для добавления комментариев необходимо авторизоваться.