Тадбирни Соғлиқни сақлаш вазири вазифасини бажарувчи Асилбек Худаяров очиб берди
Қайд этилганидек, юртимиз сил касаллигининг олдини олиш, уни эрта аниқлаш ва даволаш бўйича сезиларли натижаларга эришди.
Хусусан, ушбу хасталикка қарши курашиш учун масъул бўлган тиббиёт муассасалари инфекцион назорат қоидаларига биноан тўлиқ реконструкция қилиниб, улар илғор тиббий асбоб-ускуналар билан жиҳозланди.
Давлатимиз раҳбарининг тегишли қарори билан кўп тармоқли марказий поликлиникалар қошида “Астма ва сурункали обструктив ўпка касаллиги мактаблари” ташкил этилиб, уларда беморларга ҳаёт сифатини яхшилаш, касаллик зўрайишини олдини олиш чоралари ўргатилмоқда.
Чақалоқларни касалликка қарши эмлаш 99,8 фоизга етказилди.
Соҳада илк бор туман, шаҳар, ҳудудлараро, вилоят ва марказий лабораториялардан иборат 5 даражали тизим доирасида касалликка 2 соатда ташхис қўйиш имконини берувчи 136 та ПЦР (G-Xpert) диагностик жиҳозлар ўрнатилди. Шундан 40 таси бирламчи даволаш муассасаларига татбиқ қилинди.
Маҳаллий техник ресурслардан ва мавжуд ускуналардан фойдаланган ҳолда “Ўпка саломатлиги” мобил бригадалари ташкил этилиб, ҳозиргача 7 та вилоятда аҳолини скринингдан ўтказиш бошлаб юборилди.
Сўнгги икки йилда фтизиатрия йўналишига оид барча клиник қўлланмалар ЖССТнинг сўнгги тавсияларига асосан янгиланиб, бу бўйича жами 1 530 нафар мутахассислар қайта ўқитилди. Фтизиатрия соҳасига қайта тайёрлаш курслари давлат бюджети томонидан қопланиши натижасида 300 нафардан зиёд мутахассислар ушбу хизматга бошқа соҳалардан жалб этилди.
Булар натижасида 2023 йилга келиб туберкулёз билан касалланиш кўрсаткичи 2010 йилга нисбатан 45 фоизга, ўлим кўрсаткичи эса 87 фоизга камайишига эришилди.
Бу борада эришилган ютуқлар натижасида 2023 йилда АҚШда бўлиб ўтган БМТ Бош Ассамблеясининг туберкулёз касаллиги бўйича Олий даражадаги мажлисига Польша билан ҳамкорликда Ўзбекистоннинг ҳамраислик қилгани ҳам тарихий воқеага айланди.
Соғлиқни сақлаш вазирлиги
Матбуот хизмати.
{$ noItemsMessage $}